काठमाडौं :गैर आवासीय नेपाली संघको ११ औँ महाधिवेशनको सरगर्मी बढेको छ । उम्मेदवारी घोषणा र भेटघाटलाई तीव्रता दिएका छन् । आकांक्षा अनुसारको पदमा उम्मेदवारी घोषणा गर्ने र आफ्नो पक्षमा माहौल बनाउन नेतृत्वका आकांक्षीहरु लागेका छन् ।   

यसै क्रममा संघको सचिव पदमा अस्ट्रेलियाबाट डा. ज्ञानेन्द्र रेग्मीले उम्मेदवारी दिने तयारी गरेका छन् । एनआरएनए अस्ट्रेलियाका महासचिवको जिम्मेवारी कुशलतापूर्वक समालेका डा रेग्मी एक दशक भन्दा लामो एनआरएनएको अनुभव भएका व्यक्ति हुन् ।   

डा रेग्मी विगत १५ वर्षदेखि अस्ट्रेलियाको सिड्नीमा बस्दै आएका छन्। उच्च अध्ययन कालागि सन् २००४ मा जापान पुगेका उनी न्यु जिल्यान्ड हुँदै अस्ट्रेलिया पुगेका हुन् । उम्मेदवारी घोषणा गर्दै उनले एक दशकमा एनआरएनएको सबै गतिविधिहरूमा सहभागी हुँदै आएको र संस्थाको साखलाई बचाउने अभियानको मूल प्रवाहमा रहेर सक्रिय रूपमा लागि रहेको बताए ।   

उनले मतदाताले गलत काम भयो भन्ने अवस्था सिर्जना हुन नदिन आफू प्रतिबद्ध रहेको समेत  बताए । उनले संसारभर छरिएर रहेका गैर आवासीय नेपाली साथीहरूबिच सञ्जाललाई सदुपयोग गर्दै वैदेशिक रोजगारीमा रहेका नेपालीका समस्याहरूलाई समाधान गर्नको लागि आफूले जानेको ज्ञान र सिपलाई सदुपयोग गर्ने योजना बनाएको बताएका छन्।

रेग्मीले विभिन्न ९ बुँदामा प्रतिबद्धता सार्वजनिक गरेका छन् :

१-‘एक पटकको नेपाली सधैंको नेपाली’ : विदेशमा बस्ने हामीहरूले खोजेको नेपाली नागरिकताको निरन्तरता हो। यसका लागि नेपाल सरकारसँग निरन्तर लविङ गर्नेछु । अहिले नेपाल सरकारले प्रदान गर्दै आएको एनआरएन नागरिकतालाई उपलब्धीको रुपमा लिदै गैरआवासीय नागरिकता चाँडोभन्दा चाँडो सहज तरिकाले वितरण गर्न नेपाल सरकारका सम्बन्धित सरोकारवाला निकायसँग परामर्श गर्नेछु।

तीन पुस्तामा सीमित यो नागरिकताले गैरआवासीय नेपालीको भावनालाई नेपालसँग जोडाउने भन्दा टुटाउने काम गर्छ। नेपालमा लगानी भित्र्याउने भन्दा नेपालबाट लगानी बाहिर्याउने भूमिका खेल्न सक्छ। त्यसैले यो तीन पुस्ते व्यारियर हटाउन नेतृत्वमार्फत तत्कालै पहल गर्नेछु । विकल्पमा तत्काललाई सात पुस्तासम्म पुयाउन आधारसहित कार्यपत्र पेश गरेर नेपाल सरकारसँग लबिङ गर्नेछु । यद्यपि हाम्रो माग नेपाली नागरिकताको निरन्तरता नै हो।

२- गैरआवासीय नेपाली नागरिकता प्राप्त भएपछि अब गैरआवसिय नेपाली संघको उद्देश्यहरु रिभ्यु गरी प्राथमिकतामा राखेर संघको अबको १० वर्षको ठोस कार्यदिशा र योजना बनाउन पहल गर्नेछु ।

३- गैरआवासीय नेपालीहरुलाई नेपालमा सामूहिक लगानी गर्न मनोवल बढाउन नेपाल सरकारका सम्बन्धित निकायसँग सहकार्य गर्दै विभिन्न मोडलका योजना निर्माण गर्नेछु। समृद्ध नेपाल बोलिमा होइन योजना नै बनाएर नेपाल सरकारलाई कार्यपत्र पेश गर्न काम गर्नेछु।

४- ज्ञान, सीपको आदान प्रदान गर्न ठोस कार्यक्रम बनाएर व्यवासायी, बौद्दिक वर्ग र पेशाकर्मीहरुसँग छलफल र सहकार्य गर्नेछु।

५- वर्तमान समयमा आइसीसीका अधिकांश कामहरूलाई एनसीसीहरूले हरेक प्रकारले सहयोग गर्दै आइरहेकोमा आगामी दिनमा आइसीसीले एनसीसीलाई पनि अझ बढी सहयोग गर्ने वातावरणको सिर्जना गर्नेछु । दोहोरो सहकार्यका लागि भूमिका खेल्नेछु ।

६- आइसीसी र एनसीसीको प्रत्यक्ष कम्युनिकेसनको वातावरण बनाउनेछु।

७- विगत केही वर्षदेखि देखिएको एनसीसी र आइसीसीबीचको प्रतिधिनिधि विवाद हटाउन सबै एनसीसीको कार्यसमितिको अभिलेखालय राखेर संगठन पारदर्शी बनाउँदै प्रतिनिधि विवाद सधैको लागि अन्त्य गर्नेछु ।

८- आइसीको योजना अनि कार्यक्रमहरूलाई हरेका एनसीसीसम्म पु¥याउन समन्वयकारी भूमिकामा खेल्नेछु।

९- आइसीसी सचिवको रुपमा महासचिव र अध्यक्षलाई साथ दिँदै समितीमा सकृय भूमिका खेल्नेछु।