काठमाडौं: स्वास्थ्य तथा जनसंख्या मन्त्री प्रदीप यादवले नेपालले नसर्ने रोग र मानसिक स्वास्थ्यको जोखिम कम गर्न नेपालले काम गरिरहेको बताएका छन्।

विश्व स्वास्थ्य संगठन (डब्लुएचओ) र विश्व बैंक ग्रुपको सहकार्यमा अमेरिकाको वासिङ्टनमा भएको ‘इन्टरनेशनल डाइलग अन सस्टेनेवल फाइनान्सिङ्ग फर एनसीडी एण्ड मेन्टल हेल्थ’ कार्यक्रममा मन्त्री यादवले नागरिकमा आर्थिक भार कम हुने गरी नीतिगत रुपमा सुधार गर्दै नसर्ने रोग र मानसिक स्वास्थ्यका क्षेत्रमा काम गरिरहेको जानकारी दिए। नेपाल स्वास्थ्य सेवाको पहुँच विस्तार, गुणस्तर र वित्तीय संरक्षणमा सुधार गर्न प्रतिबद्ध रहेको बताउँदै उनले नागरिकको स्वास्थ्यलाई केन्द्रमा राखेर काम भइरहेको जानकारी दिए।

कार्यक्रममा मन्त्री यादवले नेपालमा अहिले ७० प्रतिशत भन्दा बढी रोगको भार नसर्ने रोग रहेको र उपचार तथा स्वास्थ्य सेवाका लागि सरकारको भन्दा नागरिकको खल्तीबाट बढी रकम खर्च भइरहेको जानकारी दिए। यस्तो अवस्थामा सुधार गर्नका लागि नै सरकारले स्वास्थ्य वित्त रणनीति र स्वास्थ्य बीमा कार्यक्रम ल्याएको बताए।

मन्त्री यादवले भने, “नेपालले राष्ट्रिय स्वास्थ्य योजनाहरूमा सुधार ल्याउन तथा स्वास्थ्य सेवाको पहुँचमा वृद्धि गर्न महत्वपूर्ण कदमहरू चाल्दै आएको छ । यद्यपि, यस क्षेत्रमा अझ धेरै सुधारको आवश्यकता रहेको छ ।” उनले नेपाललाई आवश्यक पर्ने वित्तीय सहयोग तथा अन्तर्राष्ट्रिय साझेदारीको लागि पनि सहयोगको अपिल गरेका छन् ।

नेपालले नसर्ने रोगहरू जस्तै मुटु रोग, मधुमेह, क्यान्सर लगायतका समस्याहरूलाई न्यूनीकरण गर्न विभिन्न कार्यक्रमहरू सञ्चालन गर्दै आएको मन्त्री यादवले बताए । मन्त्री यादवकाअनुसार मानसिक स्वास्थ्यका क्षेत्रमा पनि समुदायस्तरमा सेवाहरू विस्तार गर्दै जनचेतना कार्यक्रमहरू सञ्चालन गरिरहेको छ ।

मन्त्री यादवले अन्तर्राष्ट्रिय समुदायसँग सहयोगको अपिल गर्दै भने, “नेपालको स्वास्थ्य प्रणालीलाई बलियो बनाउन, सबै नागरिकहरूलाई गुणस्तरीय स्वास्थ्य सेवा उपलब्ध गराउन र दीर्घकालीन स्वास्थ्य योजनाहरू कार्यान्वयन गर्न हाम्रो प्रयासलाई बल पु¥याउन अन्तर्राष्ट्रिय सहयोग आवश्यक छ ।”