काठमाडौँ:आज अप्रिल ७ तारिख, विश्व स्वास्थ्य दिवस नेपालमापनि विविध कार्यक्रम गरि मनाईदै छ ।सन् १९४८ मा विश्व स्वास्थ्य सङ्गठनको स्थापना भएको दिनको सम्झना स्वरुप हरेक वर्षको अप्रिल ७ तारिखमा विश्व स्वास्थ्य दिवस मनाउने गरिन्छ । यसवर्षको नारा ‘मेरो स्वास्थ्य, मेरो अधिकार’ तय गरिएको छ ।

हरेक वर्ष आजकै दिन पारेर दिवस मनाउनुको मुख्य उद्देश्य जनस्वास्थका राष्ट्रिय अन्तर्राष्ट्रिय महत्वपूर्ण विषयहरुमा सचेतना अभिवृद्धि गर्ने, ध्यानाकर्षण गर्ने र स्वास्थ्यलाई प्रवर्द्धन गर्नु बताइएको छ । वर्तमान समयमा विश्वव्यापीरुपमा विभिन्न रोग, महामारी, विपद्का घटनाबाट सृजित चुनौतीहरु रहेका छन् । जलवायु परिवर्तन र प्रदुषण जस्ता वातावरणीय समस्याहरुले गर्दा सफा हावामा श्वासप्रश्वास लिन पाउने अधिकारबाट बञ्चित हुनु परेको छ भने खाद्य सुरक्षा, खानेपानी, सरसफाई र समग्र वातवरणमा प्रतिकुल असर परिरहेको छ ।

घरभित्र र बाहिरको प्रदूषणले प्रत्येक ५ सेकेन्डमा एक जनाको ज्यान लिइरहेको छ । डब्लुएचओ काउन्सिल अन द इकोनोमिक्स अफ हेल्थ फर अलका अनुसार विश्वका १४० भन्दा बढी देशहरूको संविधानमा स्वास्थ्य सम्बन्धी अधिकारलाई मौलिक अधिकारको रूपमा उल्लेख गरिएको छ तर सोका लागि दीगो आर्थिक लगानी संयन्त्रहरुको भने अभाव रहेको छ ।

यस बर्षको नाराले प्रत्येक ब्यक्तिको स्वास्थ्य सम्बन्धी अधिकारलाई जोड दिँदै सबै स्थानमा स्वास्थ्य सेवाको पहुँच पुर्‍याउने, मानसिक स्वास्थ्य तथा आरोग्यको सुदृढीकरण गर्ने, शिक्षा सूचनाका साथै सफा खानेपानी, स्वच्छ हावा, पोषण, गुणस्तरीय आवास, मर्यादित काम तथा वातावरणीय अवस्था, समताको सम्बोधन तथा विभेदबाट छुट्काराको विषयमा सचेतना तथा पैरवी गर्ने उद्देश्य लिएको छ ।